ກະຊວງສຶກສາທິການໄດ້ຈັດກອງປະຊຸມສຳມະນາກ່ຽວກັບການຕ້ານປະກົດການຫຍໍ້ທໍ້ໃນຂະແຫນງການສຶກສາຂຶ້ນໃນ
ວັນທີ 16 ກໍລະກົດນີ້, ພາຍໃຕ້ການເປັນປະທານຂອງ ທ່ານ ນາງ ແສງເດືອນ ຫລ້າຈັນທະບູນ, ລັດຖະມົນຕີຊ່ວຍວ່າ ການກະຊວງສຶກສາທິການ ເຊິ່ງມີບັນດາຜູ້ຕາງຫນ້າກະຊວງ ຕ່າງໆ, ບັນດາກົມອ້ອມຂ້າງກະຊວງຕະຫລອດຮອດ ສະມາຄົມໂຮງຮຽນເອກະຊົນ ແລະ ມູນນິທິການສຶກສາເຂົ້າຮ່ວມ.

ກອງປະຊຸມໄດ້ມີການສະເຫນີບັນຫາ ແລະ ວິທີການແກ້ໄຂກ່ຽວກັບການປອມແປງໃບປະກາດຈົບຊັ້ນມັດທະຍົມປາຍ, ບັນຫາ ແລະ ວິທີແກ້ໄຂກ່ຽວກັບການປອມແປງໃບປະກາສະນີຍະບັດຂອງມະຫາວິທະຍາໄລແຫ່ງຊາດ, ສະເຫນີບັນຫາ ແລະ ວິທີແກ້ໄຂກ່ຽວກັບການສັບຊ້ອນ ແລະ ການສອບເສັງຄັດເລືອກນັກຮຽນເຂົ້າຮຽນສາຍອາຊີວະສຶກສາ ແລະ ມະຫາວິທະຍາໄລ ທັງພາຍໃນ ແລະ ຕ່າງປະເທດ, ບັນຫາ ແລະ ວິທີການແກ້ໄຂກ່ຽວກັບການຄຸ້ມຄອງການສຶກສາ ພາກເອກະຊົນ ແລະ ແກ້ໄຂກ່ຽວກັບປະກົດການຫຍໍ້ທໍ້ຂອງນັກຮຽນນັກສຶກສາຢູ່ນະຄອນຫລວງວຽງຈັນ, ນອກຈາກນັ້ນກໍ່ຍັງ ຈະໄດ້ປຶກສາຫາລືຊ່ວຍແກ້ໄຂບັນຫາປະກົດການນັກຮຽນຕິດເກມ, ມົ້ວສຸມຢາເສບຕິດ ແລະ ເຂົ້າຮ້ານບັນເທີງ ແລະ ອື່ນໆ.

* ຄັດຈາກ: ຫນັງສືພິມປະຊາຊົນ, ສະບັບວັນທີ 28-07-2008