ໃນລະຫວ່າງວັນທີ 12-13 ກຸມພາ 2010 ນີ້ ຢູ່ທີ່ ແຂວງຫຼວງພະບາງໄດ້ຈັດກອງປະຊຸມດ້ານວິຊາການ ເພື່ອຄົ້ນຄວ້າ ປະກອບຄຳເຫັນ ໃສ່ຮ່າງນະໂຍບາຍກ່ຽວກັບວຽກງານຄວາມປອດໄພ, ສຸຂະພາບແຮງງານ ແລະ ຄວາມສ່ຽງຢູ່ໃນຂົງເຂດ ອຸດສາຫະກຳຂະໜາດນ້ອຍ ແລະ ຂະໜາດກາງ ຂອງບັນດາປະເທດສະມາຊິກອາຊຽນ +3 ຂຶ້ນໂດຍການເປັນ ປະທານຂອງ ທ່ານ ບຸນຄົງ ຫຼ້າສຸກັນ ລັດຖະມົນຕີຊ່ວຍວ່າການກະຊວງແຮງງານ ແລະ ສະຫວັດດີການສັງຄົມ, ທ່ານ ສາຍສະໝອນ ຄົມທະວົງ ຮອງເຈົ້າແຂວງຫຼວງພະບາງ ແລະ ມີຜູ້ແທນແຮງງານຂອງ 5 ປະເທດສະມາຊິກອາຊຽນ ແລະ 2 ປະເທດຄູ່ເຈລະຈາ (ຍີ່ປຸ່ນ ແລະ ເກົາຫຼີ) ເຂົ້າຮ່ວມ.

ກອງປະຊຸມຄັ້ງນີ້ເປັນຄັ້ງທີ 3 ໂດຍສືບຕໍ່ຈາກກອງປະຊຸມ ຄັ້ງທີ 1 ແລະ ທີ 2 ທີ່ຈັດຂຶ້ນຢູ່ປະເທດມາເລເຊຍ ໃນປີ 2007 ແລະ 2008 ເພື່ອປະກອບຄຳເຫັນໃສ່ຮ່າງນະໂຍບາຍດັ່ງກ່າວ ໃຫ້ຄົບຖ້ວນ ແລະ ແທດເໝາະກັບສະພາບແວດລ້ອມ ຂອງແຕ່ລະປະເທດ. ເນື້ອໃນຂອງນະໂຍບາຍສະບັບນີ້ ແມ່ນໄດ້ກຳນົດກ່ຽວກັບການສົ່ງເສີມໃຫ້ມີການຮ່ວມມືກັນຢ່າງໃກ້ຊິດ ລະຫວ່າງຄະນະກຳມະການສຸຂະພາບ ແລະ ຄວາມປອດໄພແຮງງານ ຂອງປະເທດສະມາຊິກ, ສົ່ງເສີມໃຫ້ມີການຝຶກ ອົບຮົມ ແລະ ຄົ້ນຄວ້າ, ແລກປ່ຽນຂໍ້ມູນຂ່າວສານດ້ວຍເທັກໂນໂລຢີທີທັນສະໄໝຮ່ວມກັນ, ພາຍຫຼັງທີ່ຮ່າງນະໂຍບາຍ ສະບັບນີ້ໄດ້ຖືກຮັບຮອງຈາກຄະນະກຳມະການດ້ານສຸຂະພາບ ແລະ ຄວາມປອດໄພແຮງງານ ອາຊຽນສຳເລັດ ມັນຈະເປັນ ເອກະສານສຳຄັນ ແລະ ເປັນຄູ່ມືໃຫ້ແກ່ຜູ້ໃຊ້ແຮງງານຂອງບັນດາປະເທດສະມາຊິກ ນຳໄປຈັດຕັ້ງປະຕິບັດຢູ່ໃນຫົວໜ່ວຍ ແຮງງານດ້ວຍມາດຕະຖານດຽວກັນ.

ທັງນີ້ເພື່ອແນ່ໃສ່ປົກປ້ອງຊີວິດ ແລະ ສຸຂະພາບຂອງຜູ້ອອກແຮງງານໃນສະຖານທີ່ເຮັດວຽກໃຫ້ມີຄວາມປອດໄພ ປາດສະຈາກຄວາມສ່ຽງຈາກການສູນເສຍຕ່າງໆ, ເປັນການກະຕຸກຊຸກຍູ້ສົ່ງເສີມ ຄຸນນະພາບຂອງການຜະລິດ ແລະ ຄຸນນະພາບຊີວິດຂອງຜູ້ອອກແຮງງານໃນບັນດາປະເທດອາຊຽນໃຫ້ດີຂຶ້ນ.

ກອງປະຊຸມດັ່ງກ່າວແມ່ນ ໄດ້ຮັບການສະໜັບສະໜູບ ດ້ານງົບປະມານຈາກກະຊວງສາທາລະນະສຸກ, ແຮງງານ ແລະ ສະຫວັດດີການສັງຄົມ ແຫ່ງປະເທດຍີ່ປຸ່ນ.