|
ສະເພາະ 2 ວັນ ຂອງມື້ເປີດ-ປິດ
ມະຫາກຳກິລາຊີເກມ ຄື ວັນທີ 9 ແລະ 18 ທັນວາ
2009, ທີ່ຈະມາເຖິງນີ້
ຜູ້ທີ່ຊື້ປີ້ເຂົ້າຊົມຈະບໍ່ມີເອົາລົດສ່ວນຕົວໄປສະໜາມກິລາ
ຫຼັກ 16 ເດັດຂາດ.
ໂດຍຜູ້ທີ່ຮັບຜິດຊອບຊີ້ນຳສະເພາະ ຄື: ທ່ານ
ພັນຕີ ຢຸດຕະພົງ ສຸວັນນະສິງ,
ຮອງຫົວໜ້າພະແນກຈາລະຈອນ ນະຄອນຫຼວງວຽງຈັນ,
ຫົວໜ້າກອງຕຳຫຼວດທາງຫຼວງ.
ທ່ານ ຢຸດຕະພົງ ກ່າວວ່າ:
ການທີ່ຫ້າມບໍ່ໃຫ້ລົດສ່ວນຕົວຂອງຜູ້ຊົມເຂົ້າໄປເຂດສະໜາມກິລາຫຼັກ
16 ໃນມື້ເປີດ-ປິດ ຊີເກມ
ກໍເພື່ອຫຼຸດຜ່ອນຄວາມແອອັດຂອງການຈາລະຈອນ.
ສຳລັບລົດທີ່ມີສິດເຂົ້າໄປແມ່ນສະເພາະລົດຂົນສົ່ງນັກກິລາ,
ຄະນະນຳນັກກິລາ, ແຂກຂອງລັດຖະບານ ແລະ
ຜູ້ມີສ່ວນກ່ຽວຂ້ອງກັບການຈັດການແຂ່ງຂັນ.
ໃນກໍລະນີທີ່ທ່ານສາມາດເອົາລົດໄປເຖິງສະໜາມກິລາ
ຫຼັກ 16
ທ່ານກໍບໍ່ມີສິດຈອດຢູ່ບໍລິເວນເດັດຂາດ,
ຜູ້ທີ່ຕ້ອງການໄປຊົມພິທີເປີດ-ປິດ
ຈະຕ້ອງໄປຂື້ນລົດຢູ່ຈຸດດັ່ງນີ້:
ຄະນະຮັບຜິດຊອບໄປຈັດສັນ 4
ຈຸດສຳຄັນສຳລັບຜູ້ຊົມທີ່ມາຈາກຕ່າງຖິ່ນ ເຊັ່ນ:
ຈຸດທີ 1 ແມ່ນ ຕະຫຼາດໜອງແຕ່ງ:
ຈັດໃຫ້ລົດທີ່ມາຈາກເມືອງສັງທອງ ແລະ
ມາຈາກທາງເລກທີ 13 ເໜືອ,
ຈຸດນີ້ຈະມີລານຝາກລົດໃຫຍ່ໄດ້ປະມານ 2,000
ຄັນ. ສຳລັບລົດທີ່ມາຈາກທາງເລກທີ 13 ເໜືອ
ທີ່ບໍ່ມີປະສົງໄປຊົມກິລາ ໃຫ້ໃຊ້ຖະໜົນສີທອງ
ຜ່ານດົງນາໂຊກ ແລ້ວເຂົ້າຕົວເມືອງ ແລະສຳລັບລົດທີ່ມາຈາກເມືອງສັງທອງ
ໃຫ້ແລ່ນຕາມຖະໜົນເລກ 11 ຜ່ານສາມແຍກສີໄຄ ແລ້ວລ້ຽວເຂົ້າຕົວເມືອງ.
ຈຸດທີ 2 ແມ່ນ ຫຼັງໂຮງຮຽນຕຳຫຼວດດອນຕິ້ວ:
ມີລານຈອດລົດທີ່ຮອງຮັບໄດ້ 1,500 ຄັນ ໂດຍເນັ້ນໃສ່ຜູ້ຊົມທີ່ມາຈາກເມືອງທຸລະຄົມ
ແລະເຂດທ່າງ່ອນ.
ສຳລັບລົດທີ່ບໍ່ມີຈຸດປະສົງມາຊົມກິລາ ໃຫ້ແລ່ນຕາມຖະໜົນໄກສອນ
ພົມວິຫານ, ຮອດສີ່ແຍກດົງໂດກ ແລ້ວລ້ຽວຂວາໄປສູ່ເສັ້ນທາງຫ້ວຍຫົງ
ເພື່ອເຂົ້າຕົວເມືອງ.
ຈຸດທີ 3 ແມ່ນ ຫຼັກ 19 (ທາງເລກທີ 13 ໃຕ້)
ຈະມີລານຈອດລົດໃຫຍ່ ໄດ້ປະມານ 1,500 ຄັນ.
ສຳລັບຜູ້ທີບໍ່ມີຈຸດປະສົງຊົມກິລາ ແຕ່ຈະເຂົ້າຕົວເມືອງຕ້ອງໄດ້ລ້ຽວເຂົ້າບ້ານດົງບັງ-ລາດຄວາຍ,
ຜ່ານສີ່ແຍກອຸດົມຜົນ ໄປຕາມທາງຕັດໃໝ່
ອອກໃສ່ສີ່ແຍກໄຟແດງຕານມີໄຊ.
ອີກເສັ້ນທາງໜື່ງແມ່ນ ໃຊ້ເສັ້ນທາງໂຄກສະອາດ-ບ້ານໂຊກຄຳ,
ຊຳເຄ້ ໄປຫາສາມແຍກວັງຊາຍ ໄປທາງໜອງໜ່ຽງ ແລ້ວເຂົ້າຕົວເມືອງ
ແລະ ເສັ້ນທາງສຸດທ້າຍແມ່ນ ແລ່ນໄປຕາມທາງໂຄກສະອາດ
ຜ່ານນາຄວາຍໄປຫາສາມແຍກຫົວຂົວ.
ຈຸດທີ 4 ແມ່ນ ຂົວມິດຕະພາບ: ເນັ້ນໃສ່ແຂກທີ່ຂ້າມມາຈາກໜອງຄາຍ
ໂດຍຈະມີລົດຕູຄອຍບໍລິການ 100 ຄັນ, ລົດແຕັກຊີ່
45 ຄັນ, ລົດສອງແຖວ 50 ຄັນ ແລະ ລົດຕຸກໆ 70
ຄັນ.
ລົດຂົນສົ່ງທຸກໆຈຸດ ລົດທີ່ຈະໄປສະໜາມກິລາ
ຫຼັກ 16 ຈະອອກທຸກໆ 5-10 ນາທີ,
ສຳລັບຜູ້ທີ່ອາໄສຢູ່ຕົວເມືອງວຽງຈັນ ແມ່ນຈະມີລົດຂົນສົ່ງສາທາລະນະ
ແລ່ນຕາມສາຍທາງສຳຄັນຕ່າງໆ
ຊຶ່ງທ່ານສາມາດລັດຂື້ນໄດ້ທຸກໆຄັນ ຫຼື
ຈະໄປຂື້ນຢູ່ສະຖານີ ທີ່ຈັດໃຫ້ ມີດັ່ງນີ້:
- ຕະຫຼາດເຊົ້າ-ຫຼັກ 16: ຈະມີລົດເມ 40 ຄັນ
ແລະ ລົດສອງແຖວ 20 ຄັນ ຊຶ່ງທຸກໆ 3 ນາທີ
ຈະມີລົດອອກ 2 ຄັນ
- ຫຼັກ 21-ຫຼັກ 16: ຈະມີລົດເມ 2,
ລົດສອງແຖວ 29 ຄັນ
- ຕະຫຼາດດົງໝາກຄາຍ-ຫຼັກ 16: ຈະລົດສອງແຖວ
10 ຄັນ
- ສະຖານີສາຍເໜືອ-ຫຼັກ 16: ຈະມີລົດເມ 45
ບ່ອນນັ່ງ 4 ຄັນ, ລົດສອງແຖວ 30 ຄັນ.
- ສະໜາມບິນ-ຫຼັກ 16: ລົດຕູ້ 30 ຄັນ ແລະ
ລົດແຕັກຊີ່ 45 ຄັນ
ບັນດາລົດຂົນສົ່ງຂອງສາຍຕ່າງໆ
ຈາກຕົວເມືອງແມ່ນຈະຜ່ານ
ຖະໜົນໄກສອນພົມວິຫານ-ຖະໜົນເລກທີ 13 ໃຕ້ ເຂົ້າດ້ານໜ້າສະໜາມກິລາ
ຫຼັກ 16.
ໃນກໍລະນີ
ທີ່ທ່ານຕ້ອງການໃຊ້ລົດສ່ວນຕົວໃຫ້ໄປໃກ້ສະໜາມກິລາ
ຈະຕ້ອງນຳໃຊ້ເສັ້ນທາງໜອງໜ່ຽງ
ຜ່ານຊຳເຄ້-ບ້ານໂຊກ-ໂຄກສະອາດ ແລ້ວໄປຈອດໄວ້ທີ່ຫຼັກ
20 ແລ້ວຂີ່ລົດຂົນສົ່ງມວນຊົນ ເຂົ້າມາຫຼັກ
16.
ສຳລັບຜູ້ທີ່ຢູ່ເຂດເມືອງຫາດຊາຍຟອງ ແມ່ນສາມາດເອົາລົດສ່ວນຕົວເຂົ້າຈອດທີ່ສູນການຄ້າລາວ-ໄອເຕັກ
ແລ້ວຂີ່ລົດເມໄປ. ສຳລັບມື້ແຂ່ງຂັນທຳມະດາ
ທ່ານສາມາດເອົາລົດສ່ວນຕົວໄປເຖິງຕໍ່ໜ້າສະໜາມກິລາໄດ້,
ທີ່ສະໜາມກິລາ ຫຼັກ 16 ສາມາດບັນຈຸລົດໃຫຍ່ ໄດ້ປະມານ
3,000 ຄັນ. ບ່ອນຈອດລົດສະໜາມກິລາບຶງຂະຫຍອງ
ແມ່ນຢູ່ທີ່ ວັດບຶງຂະຫຍອງ ແລະ ວັດພະໄຊ,
ສ່ວນສະໜາມກິລາເຈົ້າອານຸວົງ ແມ່ນຈອດໄດ້ທີ່
ຫໍວັດທະນະທຳແຫ່ງຊາດ, ຫໍພິພິທະພັນແຫ່ງຊາດ,
ສູນການຄ້າວັງທອງ
ຫຼືອາດຈອດຢູ່ຕາມເສັ້ນທາງເບື້ອງສະລອຍນ້ຳ.
ສຳລັບເຈົ້າໜ້າທີ່ຈາລະຈອນທີ່ຈະຮັບໃຊ້ໄລຍະການແຂ່ງຂັນຊີເກມ
ທ່ານ ຢຸດຕະພົງ ຄາດວ່າ ຈະມີປະມານ 1,400 ຄົນ
ຊຶ່ງລວມທັງເຈົ້າໜ້າທີ່ຂອງ
ພະແຈກຈາລະຈອນນະຄອນຫຼວງວຽງຈັນ,
ຈາກກົມຈາລະຈອນ ແລະ ນັກຮຽນຕຳຫຼວດຈາລະຈອນ
ຈຳນວນໜື່ງ ເປັນຕົ້ນ.
*
ຄັດຈາກ: ວາລະສານອັບເດດ, ສາລະໜ້າຮູ້, ວັນທີ
25-11-2009 |
