|
ປັດຈຸບັນການເອົາລັດເອົາປຽບເຊິ່ງກັນ ແລະ
ກັນ ໂດຍສະເພາະຜູ້ທີ່ຮູ້ເທົ່າບໍ່ເຖິງການ ແມ່ນຍັງມີຢູ່ຢ່າງແຜ່ຫຼາຍ
ບໍ່ວ່າຈະຢູ່ທະວີບໃດ ແລະ
ສັງຄົມໃດຂອງໂລກກໍຕາມ
ຊຶ່ງອາໄສຊ່ອງຫວ່າງຂອງລະບຽບກົດໝາຍທີ່ຄວບຄຸມບໍ່ທົ່ງເຖິງ
ທັງບວກກັບກົດກະຕິກາຂອງບໍລິສັດເພີ່ນສ້າງຂື້ນມາເອງ.
ໃນປະເທດລາວ ແລະ ໃນສັງຄົມລາວໃນປັດຈຸບັນ
ຍັງມີປະກົດການທີ່ສ້າງຄວາມຫຍໍ້ທໍ້ແກ່ສັງຄົມ
ໂດຍສະເພາະຜູ້ມີລາຍຮັບຕ່ຳ ແຕ່ຢາກມີເຄື່ອງໃຊ້ໃນເຮືອນທີ່ໃໝ່ທັດສະໄໝ
ແລະ ຄົບຊຸດ
ນອກນັ້ນຍັງມີປັດໄຈໜື່ງທີ່ຊີວິດຊາວເມືອງດັ່ງພວກເຮົານັ້ນຂາດບໍ່ໄດ້ຄື
ພາຫະນະຮັບໃຊ້ໃນຊີວິດປະຈຳວັນ ແລະ
ປັດຈຸບັນສັງເກດເຫັນວ່າມີບໍລິສັດທີ່ເພີ່ນເອີ້ນກັນແບບພາສາສາກົນວ່າ
Finance ທັງເປັນຂອງຄົນລາວ ແລະ
ຊາວຕ່າງປະເທດ ບ້ານໃກ້ເຮືອນຄຽງເຮົາ
ກໍມີຢ່າງຫຼວງຫຼາຍ ເຊິ່ງບໍລິສັດເຫຼົ່ານີ້
ຈະຮັບຈັດລະບົບເງິນກູ້ ຫຼື ໃຫ້ເຊົ່າ-ຊື້ລົດທຸກປະເພດ
ຕັ້ງແຕ່ລົດຈັກ ຈົນຮອດລົດໃຫຍ່ ໂດຍຄິດໄລ່ດອກເບ້ຍສູງ.
ເລື່ອງມີຢູ່ວ່າ ໃນວັນທີ 30 ພຶດສະພາ 2009
ຜ່ານມາ
ຂ້າພະເຈົ້າໄດ້ໄປຊື້-ເຊົ່າລົດຈັກຍີ່ຫຍໍ້ໜື່ງ
ຈາກບໍລິສັດແຫ່ງໜື່ງ ຕັ້ງຢູ່ບ້ານໂພນສະອາດ
ນະຄອນຫຼວງວຽງເຮົານີ້ເອງ ໃນລາຄາຊື້ສົດແມ່ນ
44.500 ບາດ ແຕ່ຂ້າພະເຈົ້າຂໍຈ່າຍກ່ອນ
20.000 ບາດ
ສ່ວນທີ່ເຫຼືອແມ່ນຂໍຜ່ອນຈ່າຍໃນໄລຍະເວລາ 18
ເດືອນ ໂດຍເພີ່ນຄິດໄລ່ຕົກເປັນເງິນ 2.100
ບາດ (ສອງພັນໜື່ງຮ້ອຍບາດ) ຕໍ່ເດືອນ
ຕາມສັນຍາແມ່ນເລີ່ມຈ່າຍງວດທີ 1 ໃນວັນທີ 5
ກໍລະກົດ ເປັນຕົ້ນໄປ.
ແຕ່ຕົກມາຮອດຕອນເຊົ້າຂອງວັນທີ 5 ມິຖຸນາ
2009 ເວລາ:8:45 ຂ້າພະເຈົ້າຫາແຫຼ່ງເງິນໄດ້
ເລີຍເຂົ້າໄປຫາບໍລິສັດ ດັ່ງກ່າວ ເພື່ອຂໍຈ່າຍໝົດໃນສ່ວນທີ່ເຫຼືອ
24.500 ບາດ ແຕ່ເຈົ້າຂອງບໍລິສັດດັ່ງກ່າວກັບ
ຄິດໄລ່ດອກເບ້ຍເພີ່ມນຳ ຂ້າພະເຈົ້າຕື່ມອີກ
ໂດຍອ້າງນັ້ນອ້າງນີ້ ຕາມກົດລະບຽບ ແລະ
ສັນຍາຂອງບໍລິສັດທີ່ໄດ້ເຊັນກັນ ໂດຍເພີ່ນຄິດໄລ່ດັ່ງນີ້:
- ຈຳນວນເງິນຍັງເຫຼືອ 24.500
ບາດx3%x18ເດືອນ = 13.230 ບາດ ແລ້ວເພີ່ນຫຼຸດໃຫ້ເຄິ່ງໜື່ງ
ເພາະເຫັນວ່າຫາກະ ຊື້ໄປໄດ້ພຽງ 5 ວັນ ເຫຼືອ
6.615 ບາດ (ຫົກພັນຫົກຮ້ອຍສີບຫ້າບາດ)
ບວກກັບສ່ວນທີ່ຍັງເຫຼືອລວມກັນແລ້ວ ຂ້າພະເຈົ້າ
ຕ້ອງໄດ້ຈ່າຍເປັນຈຳນວນເຖິງ 31.115 ບາດ (ສາມໝື່ນໜື່ງພັນໜື່ງຮ້ອຍກັບສາມສິບຫ້າບາດ)
ຈຶ່ງຈະປິດບັນຊີໄດ້ ເພີ່ນວ່າ ຊັ້ນ
ທັ້ງໆທີ່ຄວນຈະໄດ້ຈ່າຍ 24.500 ບາດ ຫຼື
ອາດຈະເພີ່ມເລັກໜ້ອຍເທົ່ານັ້ນ.
ສະນັ້ນຂ້າພະເຈົ້າຢາກເອົາເລື່ອງທີ່ຕົນເອງພົບພໍ້ມາບອກເລົ່າແກ່ຜູ້ອື່ນ
ໃຫ້ມີສະຕິລະວັງຕົວ !
ຊອກຮູ້ຄັກແນ່ຈຶ່ງຄ່ອຍຊື້ ບໍ່ຄວນໃຈຮ້ອນ ແລະ
ເຊື່ອໃຜໝົດ
ພ້ອມນີ້ກໍຂໍສົ່ງຂ່າວເຖິງເຈົ້າໜ້າທີ່ຂອງບ້ານເມືອງ
ບໍ່ວ່າຈະເປັນເຈົ້າໜ້າທີ່ຕຳຫຼວດ ນັກກົດໝາຍ
ຊ່ວຍສອດສ່ອງດູແລວ່າ
ບໍລິສັດດັ່ງກ່າວເຮັດຖືກ ຫຼື ບໍ່.
(ໂດຍ: ສາຍນ້ຳທອນ)
*
ຄັດຈາກ: ຫນັງສືພິມວຽງຈັນໃໝ່, ສະບັບວັນທີ
25-06-2009 |
