ສຳລັບປີ້ເຂົ້າຊົມໃນມື້ພິທີເປີດ-ປິດງານມະຫະກຳກີລາຊີເກມ ຄັ້ງທີ 25 ນັ້ນແມ່ນຈຳໜ່າຍເກືອບຈະໝົດແລ້ວ ສ່ວນປີ້ເຂົ້າ ຊົມກີລາແຕ່ລະປະເພດກໍມີວາງຈຳໜ່າຍເຊັ່ນກັນ.

ທ່ານ ພັນຄຳ ວົງຂັນຕີ ຜູ້ອຳນວຍການບໍລິສັດວົງຂັນຕີ ກໍ່ສ້າງ ຜູ້ທີ່ໄດ້ຮັບລິຂະສິດ ຈັດຈຳໜ່າຍປີ້ເຂົ້າຊົມງານມະຫະກຳ ກີລາຊີເກມ ຄັ້ງທີ 25 ໄດ້ໃຫ້ສຳພາດວ່າ: ສະເພາະປີ້ເຂົ້າຊົມພິທີເປີດ-ປິດຊີເກມນັ້ນ ມາຮອດປັດຈຸບັນແມ່ນຂາຍໃກ້ ຈະໝົດແລ້ວ ຊຶ່ງຍັງຈຳນວນໜື່ງທີ່ຜູ້ຊົມໄດ້ໂທລະສັບມາສັ່ງຈອງໄວ້ແລ້ວ ແຕ່ຍັງບໍ່ທັນເຂົ້າມາເອົາເທື່ອ ເນື່ອງຈາກບ້ານຢູ່ໄກ ຖ້າມາເອົາຊ້າກ່ອນກຳນົດແມ່ນຈະຂາຍໃຫ້ຄົນອື່ນຕໍ່ໄປ.

ທ່ານ ພັນຄຳ ວົງຂັນຕີ ໄດ້ແຈ້ງໃຫ້ຮູ້ອີກວ່າ: ປັດຈຸບັນນີ້ກໍມີຫາງສຽງອອກມາວ່າ ສະເພາະປີ້ເຂົ້າຊົມພິທີເປີດ-ປິດຊີເກມນັ້ນ ໄດ້ມີຜູ້ຊົມຈຳນວນໜື່ງຊື້ໄປແບ່ງຂາຍມື້ເປີດ ແລະ ມື້ປິດ ປີ້ເຂົ້າຊົມກີລາບານເຕະແຕ່ລະນັດ ກໍໄດ້ຊື້ໄປຂາຍຕໍ່ກິນກຳໄລ ໃນກໍລະນີນີ້ຖ້າຜູ້ໃດພົບເຫັນຕ້ອງລາຍງານຫາເຈົ້າໜ້າທີ່ໂດຍດ່ວນ ເພາະເຫັນວ່າຜິດຕໍ່ລະບຽບ ແລະ ອີກດ້ານໜື່ງຜູ້ຊົມ ທີ່ຊື້ປີ້ໄປຊົມກີລາ ໂດຍສະເພາະແມ່ນກີລາບານເຕະ ຕ້ອງເຂົ້າໃຫ້ຖືກໂຊນຂອງຕົນ ນັບແຕ່ໂຊນ A ໂຊນ B ເພື່ອປ້ອງກັນ ບໍ່ໃຫ້ແອອັດໃນສະໜາມ ແລະ ບັນຫາໜື່ງທີ່ສຳຄັນຕ້ອງເອົາໃຈໃສ່ຮັກສາເດັກນ້ອຍ ລູກຫຼານຂອງຕົນເອງໃຫ້ດີ ເພື່ອບໍ່ໃຫ້ ຍ່າງເລາະໄປມາລົບກວນຄົນອື່ນ ຫຼື ອາດຈະສ້າງຄວາມຫຍຸ້ງຍາກໃຫ້ເຈົ້າໜ້າທີ່ປ້ອງກັນຄວາມສະຫງົບໃນສະໜາມ ດີທີ່ສຸດ ແມ່ນບໍ່ຢາກໃຫ້ເອົາເດັກໄປນຳ.

* ຂັດຈາກ: ໜັງສືພິມວຽງຈັນໃໝ່, ສະບັບວັນທີ 04-12-2009